උරුම පැවරුම

 

නුඹේ මේසය අතැර දමමින් - මගේ මේසය වෙතට අවුදින්

ජීවිතේ මුල් අකුරු අමුණන දියණියේ

ඉඩ ලබා දී නුඹේ අකුරට - තිත තබාගෙන මගේ වැකියට

නික්ම යමි මේසයෙන් ඉවතට දියණියේ

ජීවිතේ බෝ අකුරු ලියැවුණු - බිඳුණු හීනෙක කඳුළු කැටිවුණු 

අකුරුවල බර හඳුනනා රළු මේසයේ

නුඹේ සියුමැලි අැඟිලි තුඩගින් - ලියැවෙනා මුදු අකුරු අතරින්

ජීවිතේ දිගු පාර සොයනා දියණියේ

සටන්බිම් වෙත සවිය මෙලවුණු - අතරමඟ අවි අතින් ගිලිහුණු

අකුරු ගිනිගෙන දැවී අළු වුණු, මේසයේ

මිනිස් ගුණ නැණ සුවඳ හඳුනන පණකුරක් වී හෝඩියේ 

ජීවිතේ ගැන අලුත් කවියක් ලියනු හෙට දින දියණියේ