Saturday, March 30, 2019

අවසන් පැවරුම












 
නිමිත්ත - දශක තුනකට ආසන්න කාලයක් රැක ගත්,  
අපේ රටේ එක් පරපුරක කටහඬ වූ  ‘ලක්දිව හා ‘හිරු පුවත්පත් එකතුව පැරණි මිතුරකුට ලබා දුනිමි.


හතලිස් ඇඳිරියෙන් ආතුර දෙඇස
සාංකාවෙන් බරිතයි, සැබැයි
පුවත්පත් රැස නුඹට පවරමි
මතක පමණක් මා සතුයි

හෙමින් පෙරළා බලන් මේ පිටු
සටන් බිම්වල හඬ ඇසෙයි
කාට අමතක වුනත් මේ පිටු
අරගලයෙ ඉතිහාසයයි

බලාපන් මේ කවි පිටුව මත
තවම නොනිවුන උණුහුමයි
නොමළ මලකින් උපන් කඳුළක්
කවියකට මුවහත තියයි

නුඹත් ලියු කවි ඔතැන ඔය ඇත
අරගලය වෙත අඬගසයි
එකම අත්තක වැසූ විහඟුන්
නඟන නාදය යළි ඇසෙයි

සංහාරයෙන් පසු ශේෂ වුන
පියාපත් යළි සොයා ඇවිදින
පරපුරක පියවර ළකුණු මඟ
නැවත නුඹ හට මුණගැසෙයි

හද සලිත මනෝ විදු ගුණ රැඳුන
සන්නිවේදන ළකුණු පෙළ ගැසුන
පරපුරක ලේ වැකුණු මේ අකුරු
නැණ සැතින් විමසීම නුඹ සතුයි

ඔය අකුරු නාඳුනන අලුත් පෙරහැරට
වල දමා - හැර දමා යනු මිසක
උගනින්න ඉතිහාස පාඩමක්
මේ මහලු පිටු අතර නෑ තමයි

එහෙත් සොහොයුර බලන්,
දුර්වර්ණ - මේ මහලු කඩදාසි
කාලයේ සැඟව ගිය, පරපුරක
පණ ගැහුණු එකම කටහඬයි !

Thursday, December 6, 2018

අහඹු හමුවක්


Image result for Alone Man

දැන් එතැන මං නෑ සහෝ...
 හිටියෙ අතනත් ටික දවසයි
දේශපාලනේ දැන් නම් තිත්තයි !

ඇඩ්වටයිසින් ඒජන්සියක
කුරුටු ගානවා කොපි
ප්‍රාග්ධනයේ මාත්‍රාවට...
ගොඩදාගන්නේ එහෙමයි,
මේ ජීවිත මොහොත!

ඇරියස් කවර් වෙලා වගේ,
කෙල්ලොම තුන් දෙනෙක් අපට
හරි බරයි ජීවිතේ දැන් !

පෝස්ටර් දැක්කාම තාමත්
මතක් වෙනවා අතීතය
නොදැක්කා වගේ එතකොට
යනවා අහක බලාගෙන !

ප්‍රදර්ශනේ නොහිටපු
දන්න කියන පරණ සහෝදරවරු
දකිනවා ඉඳ හිට මඟ තොටක..
වැඩි දෙනෙක් දැන් තැන් තැන්වල

සමහරුන් දැක්කත් යන්නේ
නොදන්නා ගානට..
කෙනෙක් දෙන්නෙක් නම්,
කතා කරනවා තාමත් මූණ බලාගෙන !

අනාගතයක් නැතත්,
ඉතිහාසයක් තිබුණු වග දැනිලා
හුස්ම වැටෙන්ඩ ගන්නවා ආයෙත්
පරණ පුරුදු විදියට ...!


Monday, November 19, 2018

සිහබා අභිමුව...




















නිමිත්ත - විසි වසරකට පසු යළි ‘සිංහබාහු‘ නරඹා..


විසි වසකට පෙර නාඹර වයසක

රඟහල කෙළවර හුදෙකලාව හිඳ

‘සිහබා‘ එපුවත නැරඹූ දිනයෙක

සිය පුතු වෙනුවෙන් පියකුගෙ හදවත

සැලෙනා රිද්මය නොම වැටහුණි මට !



‘සිහබා‘ විලසින් ලෙන් දොර බිඳහැර

හිතුවක්කාරව ලොව දකිනා සඳ

පියෙකුගෙ ඔවදන් ඇසෙනා සවනක්

නොතිබිණ මා හට, යට ගිය එදවස !



විසි වසකට පසු ගුහාගතව හිඳ

පියඹ, දියණි හා පුතණුද සමගින

‘සිහ පවුලක්‘ ලෙද රඟහල කෙළවර

‘සිහබා‘ එපුවත නරඹන මෙදවස

සිය පුතු වෙනුවෙන් පියකුගෙ හදවත

සැලෙනා රිද්මය මා හද හඬවත !



‘සිහබා‘ විලසින් මා පුතු මතු දින

බිඳ දා ලෙන් දොර - යනු ඇත ලොව වෙත

යට ගිය එදවස - ම‘පියා සිටි ලෙස

මා ද සිටිනු ඇත - මතු දින එවිලස !


(කොළඹ, ආනන්ද විද්‍යාලයේ සිංහල සාහිත්‍ය සංගමය විසින් සංවිධානය කරන ලද ‘අනඳ පැහැසරණිය - 2018‘ සමස්ත ලංකා සාහිත්‍ය නිර්මාණ තරගාවලියේ විවෘත අංශයේ පද්‍ය රචනා තරග ඉසව්වෙන් ප්‍රථම ස්ථානය දිනාගත්තේ මගේ මෙම පද්‍ය නිර්මාණයයි.)

Friday, December 15, 2017

ඉපැරණි උදෑසනකට ඇමතුමක්




ඉර ඉතිං ඩිංගකට නවතින්න
අතීතෙට ඇවිද යන්නට එන්න
කාලයේ ගිලී ගිය මතක අමුනන්න
ඉර ඩිංගකට නවතින්න

දොළ දියේ කදුරු මල් එක්ක පීනන්න
තණ පලස මත පිපුණු පිණි බිංදු අහුලන්න
විහඟ ගීයක් දිගේ පියඹා යන්න
ඉර ඉතිං ඩිංගකට නවතින්න

උදා ගීයක මිහිර සර විඳගන්න
කතා කරනා බසය එන තුරු ඉන්න
ඉර ඉතිං ඩිංගකට නවතින්න
අතීතෙට ඇවිද යන්නට එන්න